Զեյթունի հանրակացարանում սենյակները տրամադրվում են 11 ամիս ժամկետով։ Վարձի ողջ չափը կազմում է 110,000 ՀՀ դրամ

Արտարժույթով վարձավճարին ծանոթանալու համար հետևեք ՀՀ Կենտրոնական բանկի փոխարժեքին:

Ուշադրությո՛ւն. Վարձավճարի գումարը չի ներառում հոսանքի վարձը։ Սպառած էլեկտրաէներգիայի քանակի հաշվարկման կարգին ու «ՀԷՑ» ՓԲԸ-ի կողմից էլեկտրական էներգիայի վաճառքի սակագներին ծանոթացեք այստեղ:

Յուրաքանչյուր սենյակում կարող է բնակվել մինչև երկու ուսանող։

Ուշադրությո՛ւն. Եթե ուսանողը ցանկանում է սենյակում բնակվել միայնակ, պետք է վճարի երկու անձի վարձավճար՝ 220,000 ՀՀ դրամ:

Հանրակացարանների բոլոր սենյակները հագեցած են օգտագործման համար անհրաժեշտ պարագաներով և կահավորանքով, այդ թվում՝ մահճակալներով, զգեստապահարանով, աթոռներով և սեղանով։ Բացի այդ, սենյակում հասանելի է մշտական ջուր, առկա է կենտրոնացված ջեռուցման համակարգ:

Խոհանոցը, սանհանգույցներն ու լոգարանն ընդհանուր են։ Լոգարանը վճարովի է (500 ՀՀ դրամ յուրաքանչյուր օգտագործման համար)։

Ուշադրությո՛ւն. Կոնսերվատորիան հանրակացարանին տրամադրել է սահմանափակ քանակությամբ դաշնամուրներ, որոնք ԵՊԿ ուսանողի ցանկության դեպքում կարող են տեղադրվել նրան տրամադրվող սենյակում։ Դաշնամուրները սենյակներում տեղադրվում են անվճար՝ առաջին եկողի սկզբունքով: Դրանց խնամքը ուսանողի պատասխանատվության ներքո է:

Ձեր սենյակում դաշնամուր տեղադրելու համար դիմեք կացության փաստաթղթերն ընդունող աշխատակցին։

Ունե՞ք հարցեր

Ուշադրությո՛ւն. Ստորև ներկայացված կարգը գործում է Կոնսերվատորիայի բոլոր ուսանողների համար:

Զեյթունի ուսանողական հանրակացարանում սենյակ վարձելու համար հարկավոր է ընթացիկ տարվա քննական շրջանի ավարտի և հաջորդ ուսումնական տարվա սկզբի միջև ընկած ժամանակահատվածում (ապագա ուսանողների դեպքում՝ ընդունելության քննությունների պատասխանների ստացման և ուսումնական տարվա սկզբի միջև ընկած ժամանակահատվածում) դիմել Ձեր ֆակուլտետի դեկանատ՝ Կոնսերվատորիայի ուսանող հանդիսանալու մասին տեղեկանք ստանալու համար:

Տեղեկանքը տրամադրվում է անմիջապես և պետք է կրի ռեկտորի կամ պրոռեկտորներից որևէ մեկի ստորագրությունը:

Տեղեկանքը, ինչպես նաև Ձեր անձնագրի պատճենն ու երկու լուսանկար (3x4սմ) հարկավոր է առձեռն ներկայացնել հանրակացարանի տնօրենին։

Բնակության տեղի հատկացման մասին որոշումը կացարանի տնօրինությունը կայացնում է տեղում։Ուսանողը կարող է հանրակացարանում տեղավորվել ղեկավարության դրական պատասխանը ստանալուց անմիջապես հետո:

Ուշադրությո՛ւն. Ուսանողը կարող է մերժվել միայն ազատ սենյակի բացակայության դեպքում։

Ունե՞ք հարցեր

Հանրակացարանի վարձը հարկավոր է վճարել վերոնշյալ փաստաթղթերը հանրակացարան ներկայացնելիս՝ միանվագ կարգով։

Հնարավոր է նաև վճարումը կատարել 50%-50% տարբերակով՝ վճարելով երկու անգամ 55,000-ական ՀՀ դրամ. առաջին անգամ՝ փաստաթղթերը ներկայացնելիս, երկրորդ անգամ՝ մինչև գարնանային կիսամյակի սկիզբը։ Վճարման պայմանները հստակ ձևակերպվում են հանրակացարանի և ուսանողի միջև ստորագրվող պայմանագրում։

Հուշում. Հանրակացարանի ադմինիստրացիան գերադասում է վճարման միանվագ տարբերակը։

Վճարումը հնարավոր է կատարել տեղում կանխիկ տարբերակով կամ բանկային փոխանցման միջոցով։ Վերջին դեպքում հարկավոր է մոտենալ հանրակացարանի հաշվապահություն՝ համապատասխան տվյալները ստանալու համար։

Եթե ուսանողի բնակության վարձը հոգում է որևէ կազմակերպություն, ապա հաշվապահության կողմից հաշիվ է դուրս գրվում այդ կազմակերպությանը։

Ուշադրությո՛ւն. Ո՛չ պետությունը, ո՛չ էլ Կոնսերվատորիան չեն տրամադրում ֆինանսական աջակցություն հանրակացարանում կացության վարձը վճարելու համար։

Ունե՞ք հարցեր