Welcome!

Սիրելի ուսանողներ, Երևանի Պետական կոնսերվատորիան համայն հայության երաժշտական բարձրագույն կրթական հաստատությունն է: Այն ունի հարուստ մշակութային ավանդույթներ: Հայաստանում գործող բոլոր երաժշտական կոլեկտիվներն ու անհատ կատարողները այս կոնսերվատորիայի սաներն են: Այստեղ դասավանդել և դասավանդում են միջազգային համբավ ու հարգ ունեցող երաժիշտներ: Այսօր էլ մեր կոնսերվատորիայի սաները հանդես են գալիս աշխարհի բեմերում և համալրում տարբեր երկրների պատվավոր երաժիշտների շարքերը:
Դուք այս օրվանից այս կոնսերվատորիայի համար և պատասխանատու անձ եք, և նրա հռչակն ու պատիվը կիսող երիտասարդ երաժիշտ:
Մաղթում եմ Ձեզ ուսման, մասնագիտական կատարելագործման արդյունավետ աշխատանք: Եվ վստահ եմ, որ Կոմիտասի անունը կրող կոնսերվատորիան Ձեր մասնագիտական կենսագրության մեջ կդառնա ամենակարևոր օջախը:


                                ԵՊԿ ռեկտոր, պրոֆ.՝ ՇԱՀԵՆ  ՇԱՀԻՆՅԱՆ

Հունիսի 14-ին ավարտվեց Արամ Խաչատրյանի անվան 13-րդ միջազգային մրցույթը, որը այս տարի անցկացվեց վոկալ մասնագիտությամբ և բացահայտեց լավագույն վոկալիստների:

13-րդ խաչատրյանական մրցույթի հաղթող ճանաչվեց Երևանի Կոմիտասի անվան պետական կոնսերվատորիայի ուսանողուհի Ջուլիետտա Ալեքսանյանը /պրոֆեսոր Սուսաննա Մարտիրոսյանի դասարան/: Երկրորդ մրցանակը շնորհվեց Ազամատ Ժելտիրգուզովին Ղազախստանից, որն ավարտել է Կոմիտասի անվան կոնսերվատորիայի մագիստրատուրան /պրոֆեսոր Սուսաննա Մարտիրոսյանի դասարան/, իսկ երրորդ մրցանակը շնորհվեց Գագիկ Վարդանյանին, նույնպես ԵՊԿ ուսանող /պրոֆեսոր Օլգա Զախարյանի դասարան/:  Հանձնվեցին նաև հատուկ մրցանակներ: Մրցույթի մասնակիցներից Լիլիանա Նատալի Բյուիքիանսը /ԱՄՆ/ հատուկ մրցանակների արժանացավ Կոմիտասի երգի, ինչպես նաև 17-18-րդ դարերի արիայի լավագույն մեկնաբանությունների համար: Հայ կոմպոզիտորի երգի լավագույն մեկնաբանության համար հատուկ մրցանակ ստացավ Գագիկ Վարդանյանը: 

Մի քանի հատուկ մրցանակների՝ ռուս կոմպոզիտորի արիայի լավագույն մեկնաբանության, ազգային երգի լավագույն մեկնաբանության, Տիգրան Չուհաճյանի «Արշակ Բ» օպերայից Արշակի արիայի լավագույն մեկնաբանության համար արժանացավ Ազամատ Ժելտիրգուզովը:

Մի շարք հատուկ մրցանակներ շնորհվեցին մրցույթի հաղթող Ջուլիետտա Ալեքսանյանին:

Հանդիսատեսի համակրանք մրցանակին արժանացավ Տիգրան Օհանյանը /Հայաստան/:

Լավագույն կոնցերտմայստեր ճանաչվեց Ելենա Վարդազարյանը:

Հատուկ մրցանակներ շնորհեցին նաև հեղինակավոր ժյուրիի անդամների կողմից: 

Շնորհավորում ենք բոլոր մրցանակակիրներին: